Charlatana | Tropa de trapo - O ritmo do camiño

SINOPSE

Todo comezou hai anos, nun parque. Antía era unha nena galega e Wamba un rapaz do Congo. Chocaron e compartiron o que tiñan : Antía a súa merenda e Wamba as súas historias. E aí comezou un camiño. Pero botarse a andar pola vida é o que ten : que dás moitas voltas!.

…E agora os seus camiños separáronse. Antía é unha cooperante na aldea de Wamba, en África, e Wamba percorre Europa buscándose a vida. Aínda que no fondo os dous andan o mesmo camiño : o seu.

Reciclaxe, música, amizade, historias… Aldeas de xigantes, animais que cantan para entenderse, unha fonte sen auga por culpa do cu dun xigante, unha aldea que canta cun caldeiro…

Contos que comparten Antía e Wamba, África e Europa, para aprender a compartir, a afrontar os problemas con optimismo, a resolvelos falando… ou mellor aínda : cantando!.

Sen parar nunca o ritmo dos pés, porque neles está o ritmo do noso camiño.

FICHA ARTÍSTICA

Elenco : MARTA ORTIZ e BRAIS DAS HORTAS
Nome do espectáculo : O RITMO DO CAMIÑO
Modalidade artística : Narración oral, música en directo
Público ao que vai dirixido : Infantil e familiar
Idioma : Galego
Duración do espectáculo : 60 min
Ubicación : Interior ou Exterior

Facemos contos con música. Historias que teñen moito que dicir, cun trasfondo social e unha vertente pedagóxica coidada. E música con todo tipo de instrumentos e obxectos.

Info

A Tropa de Trapo somos Marta Ortiz e Brais das Hortas.
Xuntos contamos para todo tipo de públicos (infantil e familiar, adolescente e adulto) e en todo tipo de situacións (auditorios, casas da cultura, institutos, colexios, prisións, rúas, prazas, cemiterios…).
Facemos contos con música.
Historias que teñen moito que dicir, cun trasfondo social e unha vertente pedagóxica coidada.
E música co que sexa. Tanto instrumentos habituais (guitarra eléctrica, clásica e acústica, frautas, acordeón, loopstation, laúde árabe…) coma creados por nós (beatería de refugallo, antenas tubulares, efectos sonoros…). Música que lle dá ambiente aos contos ou para bailarmos coa xente.
Sempre con ritmo, humor e moita participación do público.
Levamos 10 anos contando e percorrendo a xeografía galega. Xiramos xa 6 veces co Fondo Galego de Cooperación e Solidariedade, tamén fixemos funcións escolares coa Fundación Abanca por auditorios e teatros de toda Galicia, centos de colexios e institutos, festivais, romarías e festas… Porque todo sitio é bo para unha boa historia.